Имрӯз дар Донишкадаи исломии Тоҷикистон нишасти матбуотии Кумитаи дин ва танзими ҷашну маросими назди Ҳукумати Ҷумҳурии Тоҷикистон ва Донишкадаи исломии Тоҷикистон  баргузор гардид.

Дар нишасти матбуотӣ роҳбарияти Кумитаи дин ва танзими ҷашну маросими назди Ҳукумати Ҷумҳурии Тоҷикистон, Донишкадаи исломии Тоҷикистон, намояндаи Дастгоҳи иҷроияи Президенти Ҷумҳурии Тоҷикистон ва доираи васеи намояндагони васоити ахбори омма ҳузур доштанд. Ба саволҳои хабарнигорон аз ҷониби роҳбарияти Кумита ваДонишкадаи исломии Тоҷикистон ба номи Имоми Аъзам посухҳои мушаххас дода шуд. 

Фаррухулло Олимзода Муовини якуми Раиси Кумитаи дин танзими ҷашну маросими назди Ҳукумати Ҷумҳурии Тоҷикистон зимни нишасти хабарӣ ба рӯзноманигорон иттилооъ дод, ки тибқи маълумоти пешниҳодшуда, айни замон дар ҷумҳурӣ 4058 иттиҳодияи динӣ ба қайди давлатӣ гирифта шудааст. Дар ин давра аз ҷониби иттиҳодияҳои динӣ ба ятимону маъюбон, шахсони бепарастор ва оилаҳои камбизоат ба маблағи зиёда аз 7,3 миллион сомонӣ кумакҳои моддӣ ва молиявӣ расонида шудааст.

Дар самти ташкили ҳаҷ, арзиши хизматрасонӣ барои мавсими ҳаҷи соли 2026 53 ҳазор сомонӣ муайян гардида, маросими ҳаҷ дар сатҳи баланд баргузор шуд. Ҳамчунин, дар нимсолаи аввал 1310 нафар шаҳрвандони Тоҷикистон барои адои умра ба Шоҳигарии Арабистони Саудӣ сафарбар гардиданд.

Дар самти иҷрои Қонуни Ҷумҳурии Тоҷикистон «Дар бораи танзими ҷашну маросим», дар саросари кишвар 8661 рейд гузаронида шуда, 704 парвандаи ҳуқуқвайронкунии маъмурӣ баррасӣ гардид. Ҳаҷми умумии ҷаримаҳои таъингардида 5 миллиону 97 ҳазору 96 сомонӣ-ро ташкил додааст.

Инчунин, Кумита дар шаш моҳи аввали соли ҷорӣ 801 дархост оид ба ташхиси давлатии диншиносӣ баррасӣ намуда, нисбати 411 дархост бинобар мавҷуд будани нишонаҳои ифротӣ хулосаи манфӣ ва нисбати 390 дархост хулосаи мусбат пешниҳод кардааст.